Rusiyada FaceTime bloklandı

Roşkomnadzor "FaceTime" xidmətinə məhdudlaşdırıcı tədbirlər tətbiq edir

Roşkomnadzor Apple şirkətinə məxsus videozəng tətbiqi FaceTime barədə "məhdudlaşdırıcı tədbirlər" tətbiq etdiyini açıqlayıb. Qurumun mətbuat xidmətindən "Qazeta.ru"ya verilən məlumata görə, bu qərar xidmətin ölkə ərazisində terror aktlarının təşkili, icraçılarının cəlb edilməsi, fırıldaqçılıq və digər cinayətlərin törədilməsi üçün istifadə edilməsi ilə əlaqədardır.

Qurum rəsmiləri bildiriblər ki, FaceTime Rusiya hüquq-mühafizə orqanlarının məlumatına əsasən, "ölkə ərazisində terror aktlarının təşkili və həyata keçirilməsi, icraçılarının cəlb edilməsi, fırıldaqçılıq və vətəndaşlarımıza qarşı digər cinayətlərin törədilməsi" üçün istifadə olunur. Bu səbəbdən Roşkomnadzor FaceTime xidmətinə qarşı məhdudlaşdırıcı tədbirlər tətbiq etdiyini bəyan edib. Qurumun xidməti nə vaxt bloklamağa başladığı dəqiqləşdirilmir.

İstifadəçilərin şikayətləri və rəsmilərin bəyanatları

Rusiyalı istifadəçilər 2025-ci ilin oktyabr ayının ortalarından etibarən FaceTime işində problemlərdən şikayətlənməyə başlayıblar. Bu xidmətə qarşı şikayətlər qeyri-sabit əlaqə və ya zənglərin tamam kəsilməsi ilə bağlı idi.

Dövlət Dumasının Əmlak Məsələləri Komitəsinin sədri Sergey Qavrilov 2025-ci ilin sentyabr ayının əvvəlində bəyan etmişdi ki, fırıldaqçılar FaceTime xidmətindən istifadə etməyə başlayıblar. O vurğulamışdı ki, "əvvəllər bu cür hücumların əksəriyyəti messencerlər və ya nömrələrin dəyişdirilməsi ilə adi telefon zəngləri vasitəsilə həyata keçirilirdisə, indi cinayətkarlar Apple-ın daxili videozəng xidmətindən aktiv şəkildə istifadə edirlər".

"WhatsApp" və "Telegram"dan sonra FaceTime

Bu, Roşkomnadzor tərəfindən tətbiq edilən ilk belə məhdudiyyət deyil. 2025-ci ilin avqust ayında qurum "WhatsApp" və "Telegram"da zənglərin qismən bloklandığını elan etmişdi. O zaman qərar bu messencerlərin "pul qoparma və aldatma, Rusiya vətəndaşlarını diversiya və terror fəaliyyətinə cəlb etmək üçün istifadə olunan əsas səsli xidmətlər" halına gəlməsi ilə izah edilmişdi. Həmin dövrdə Google Meet zəng və videokonfrans xidməti rusiyalı istifadəçilər arasında ən çox yüklənən proqramlardan birinə çevrilmişdi. Lakin avqustun sonlarından etibarən bu xidmət də Rusiyada fasilələrlə işləməyə başlamışdı.

24 saat