Teksasın mərkəzi hissələrində baş verən
daşqın fəlakəti, səhraları ilə tanınan quraq ştatı sular altında qoydu.
Güclü yağışlar nəticəsində qabaran Qvadalupe çayının ətrafında, əksəriyyəti uşaq olmaqla 96 nəfər həyatını itirdi. Avtomobillər və evlər sel sularına qapılaraq yoxa çıxdı.
Kerrvil şəhərinə nəqliyyat yalnız qayıqlar və helikopterlərlə təmin edildi.
Kerrvil şəhəri yaxınlığında yerləşən xristian qızlar düşərgəsi "Camp Mystic" ən ağır zərbəni aldı. Düşərgə rəhbərliyi 27 düşərgə sakini və əməkdaşının öldüyünü rəsmən elan etdi. On qız uşağı və bir düşərgə əməkdaşı hələ də itkin düşüb.
DAŞQININ ACIOĞLU NƏTİCƏLƏRİ
Axtarış-xilasetmə qrupları sıx palçıq və dağıntılarla örtülü ərazidə işlərini davam etdirərkən, səlahiyyətli şəxslər yaxınlaşan yeni fırtınaların işləri daha da çətinləşdirə biləcəyini bildirdilər.
Bazar ertəsi günorta yalnız Kerr qraflığında 84 nəfərin cansız cəsədi tapıldı. Bu şəxslərdən 28-nin uşaq olduğu açıqlandı.
Qonşu beş qraflıqda isə daha 12 nəfərin
daşqın səbəbindən həyatını itirdiyi bildirilir. 41 nəfərin taleyi hələ də naməlumdur.
Bu arada, qızlar düşərgəsinin ortaq sahibi və direktoru Riçard İstland sel zamanı uşaqları xilas etməyə çalışarkən həyatını itirdi.
Onun nəvəsi Corc İstland sosial şəbəkədə “Əgər təbii yollarla ölməsəydi, qızları uğrunda ölməsi qaçılmaz idi” – deyə yazdı.
XƏBƏRDARLIQ SİSTEMLƏRİNİN ƏHƏMİYYƏTİ
Fəlakətin yeni dalğası üfüqdə görünərkən, ştat səlahiyyətliləri erkən xəbərdarlıq sistemlərinin bir çox həyatı xilas edə biləcəyini vurğuladılar.
Teksas Qubernatorunun müavini Dan Patrik
Kerrvildə sirenlər sisteminin qurulması üçün ştatın gələn yaya qədər tədbirlər görəcəyini bildirdi.
Patrik qeyd etdi ki, “Burada sirenlər olmalı idi. Əgər olsaydı, bəlkə də bəzi həyatları xilas edə bilərdik.” Bu açıqlama, səkkiz il əvvəl
daşqın xəbərdarlıq sisteminin qurulmasının büdcə çatışmazlığı səbəbindən ləğv edildiyini üzə çıxaran xəbərlərdən sonra verildi.
24 saat
