Üç Oskar mükafatlı aktyor 8 illik fasilədən sonra oğlu üçün qayıtdı

Daniel Day-Lewis oğlu tərəfindən idarə olunan və adı “Anemone” olan dramda əsas rolda çıxış edir. Film siyasi və şəxsi zorakılıqla zəngin keçmişlərin, bağışlanmağın qeyri-mümkün göründüyü ağır yükünü araşdırır. Uzun müddətdir gözlənilən bu ekran əsərinin ilk vizualı kinosevərlərlə bölüşülüb.

Usta aktyor filmin süjet xəttinə görə, Şimali Britaniya meşələrində tənhalıqda yaşayan bir insanı canlandırır. Onun qəhrəmanı illər əvvəl baş verən faciəvi hadisələrdən sonra yolları ayrılmış qardaşı ilə təsadüfən qarşılaşır. Bu görüş keçmişin dərin yaralarını yenidən üzə çıxararaq iki qardaş arasında gərginliyi artırır.

GÜCLÜ AKTYOR HEYƏTİ İLƏ FƏRQLƏNİR

“Anemone” yalnız Day-Lewisin ekranlara qayıdışı ilə deyil, həm də güclü aktyor heyəti ilə diqqət çəkir. Filmdə iki dəfə BAFTA mükafatı laureatı Şon Bin, Oskar namizədi Samanta Morton, Samuel Batemli və Safiya Okli-Qrin kimi tanınmış simalar yer alıb.

Ekran əsəri dünya premyerasını 26 sentyabr tarixində Nyu-York Film Festivalında keçirəcək. Maraqlı bir təsadüf olaraq, Day-Lewis 2012-ci ildə Stiven Spilberqin rejissorluğu ilə çəkilmiş “Linkoln” filminin qalasını da eyni festivalda etmişdi. Həmin filmdəki Abraham Linkoln obrazı aktyora üçüncü Oskarını qazandırmışdı. Onun ilk mükafatı 1989-cu il istehsalı “Sol Ayağım”, ikincisi isə 2007-ci ildə çəkilmiş “Qan Töküləcək” filmləri ilə əldə edilmişdi.

8 İL SONRA EKRANLARA GERİ DÖNÜŞ

“Anemone”, Daniel Day-Lewisin 2017-ci ilin Pol Tomas Anderson filmi olan “Phantom Thread”dən bəri rol aldığı ilk tammetrajlı ekran işidir. Aktyor həmin dövrdə verdiyi açıqlama ilə aktyorluq fəaliyyətini tamamilə dayandırdığını bildirmiş və “Bu, şəxsi bir qərardır və bu barədə nə mən, nə də nümayəndələrim başqa şərh verməyəcək” demişdi.

O, qərarının səbəblərini “W” jurnalına verdiyi müsahibədə daha ətraflı izah etmişdi. Day-Lewis bildirmişdi ki, “Açıqlama vermək mənim tərzim deyildi, lakin bir xətt çəkmək istəyirdim... Bu dəfə fərqli idi, daxilimə işləmişdi. Etməli olduğum bir şey idi.” Aktyorluq ehtirası ilə bağlı səmimi bir daxili analiz yaşadığını vurğulayaraq, “Tamaşaçı işimə inanırsa, bu mənə kifayət etməli idi, lakin son vaxtlar bu, mənə bəs etmir” sözlərini söyləmişdi.

24 saat