2017-ci ildə doqquz nəfəri vəhşicəsinə qətlə yetirən və "Twitter Qatili" kimi tanınan Takahiro Şirayşi Yaponiyada edilib. Şirayşi sosial şəbəkələrdə tanış olduğu gənc qadınları evinə dəvət edərək boğub öldürdükdən sonra cəsədlərini hissələrə ayırıb soyuducularda gizlətmişdi. Şübhəli şəxs 2017-ci ilin oktyabrında Tokio yaxınlığında həbs olunub və daha sonra cinayətləri etiraf edib.
Yaponiyada Üç İldən Sonra İlk Edam
Məhkəmə 2020-ci ildə Şirayşini ölüm cəzasına məhkum edib. Bugünkü cəza icrası Yaponiyada 2022-ci ildən bəri tətbiq edilən ilk edamdır.
Qurbanlar və Cinayətin Detalları
Ədliyyə naziri Keysuke Suzuki icradan sonra verdiyi açıqlamada Şirayşinin törətdiyi cinayətləri "soyğunçuluq, təcavüz, qətl, cəsədləri hissələrə ayırma və gizlətmə" kimi sadalayıb. Suzuki əlavə edib ki, doqquz qurban döyülərək və boğularaq öldürüldü, sonra parçalandı. Bəzi hissələr qutularda saxlanılıb, bəziləri isə zibilliyə atılıb.
Şirayşi 15-26 yaş arası gənc qadınların əksəriyyətini Twitter-də (indiki adı ilə X) taparaq, intihar düşüncələri olan şəxslərə "ölmələrinə kömək edə biləcəyini" deyərək onları evinə dəvət edib. Polis mənbələrinə görə, məhkəmədə qatil cəsəd hissələrini evindəki soyuducularda saxladığını və cinayətləri ətraflı şəkildə etiraf etdiyini bildirib.
Yaponiyada Edam Sistemi Müzakirələrin Mərkəzində
Yaponiya G7 ölkələri arasında ABŞ ilə yanaşı hələ də ölüm cəzasını tətbiq edən iki ölkədən biridir. 2024-cü ildə aparılan ictimai rəy sorğusuna görə, yapon xalqının 83 faizi ölüm cəzasını "qaçılmaz" hesab edir. Lakin sistemin gizliliyi və məhkumların icradan yalnız saatlar əvvəl xəbər tutması beynəlxalq ictimaiyyətdə tənqid mövzusu olaraq qalır. 2023-cü ilin dekabr ayına olan məlumata görə, ölkədə 107 məhbus ölüm cəzasını gözləyir. Burada edamlar yalnız asılmaqla həyata keçirilir.