Yüksel Yıldırım "O səs"in Yunanıstana qədər getdiyini düşünür

Samsunspor prezidentindən transfer açıqlaması

Samsunspor klubunun prezidenti Yüksəl Yıldırım, UEFA Avropa Liqasının pley-off mərhələsinin cavab oyununda Yunanıstanın Panatinaikos komandası ilə heç-heçə etdikdən sonra mətbuat konfransında fikirlərini bölüşüb. Avropa Konfrans Liqasında əllərindən gələni edəcəklərini vurğulayan Yıldırım, "Bu gecənin çətin olacağını bilirdik. Ağır bir mübarizədən keçdik və turu adlamaq istəyirdik. Komanda əla mübarizə apardı. Oyun 0-0 başa çatdı, ancaq sadəcə hesaba baxıb qiymətləndirmək düzgün deyil. Panatinaikos tərəfi heç-heçəyə sevindi, bu da bizim göstərdiyimiz mübarizənin dəyərini göstərir" deyib.

Yüksəl Yıldırım matçla bağlı təhlilində bunları qeyd edib: "Oyunun əvvəlində Emrenin qapıçı ilə təkbətək çıxdığı vəziyyəti qaçırması, daha sonra Musabanın təhlükəli hücumları oldu. Futbol şansı bu gün bizdən üz döndərdi, lakin meydanda hər şeyini ortaya qoyan komandamızla fəxr edirəm. Musaba bu mövsüm ilk matçına çıxdı, tempini tapanda daha çox şey edəcək. Holse zədədən qayıtdı, ikinci hissədə oyuna daxil oldu və əlindən gələni etdi. Biz meydanda əlimizdən gələnin ən yaxşısını etdik, sadəcə qol vura bilmədik. Panatinaikos müdafiəyə meyilli komandadır, Şaxtyor Donetskə qarşı da iki oyunda qol buraxmamışdılar. Biz də sıxışdırdıq, cəhd etdik, amma alınmadı. Azarkeşlərimizə də təşəkkür etmək istəyirəm. Bu axşam 25 minə yaxın Samsunspor azarkeşi stadiona gəlmişdi. 90 dəqiqə ərzində susmadan, aslanlar kimi dəstək verdilər. O səsin Yunanıstana qədər getdiyinə inanıram. Bu dəstək bizim üçün çox dəyərlidir".

Yeni transfer hazırlığı

Transfer işləri və Super Liqada qarşılaşacaqları Trabzonspor matçı haqqında danışan Yıldırım, " Transfer mövzusunda da işlərimiz davam edir. Mujanı icarə əsasında Belçikaya göndərdik. Yerinə əcnəbi bir cinah oyunçusu ilə danışıqlar aparırıq, böyük ölçüdə razılığa gəldik. Bundan əlavə, bir forvard transferi üçün də təşəbbüslərimiz var. Yerli oyunçu olaraq da Əyyub Aydınla bağlı əlaqələrimiz davam edir. Bu transferləri tamamladıqdan sonra heyətimizin daha da güclənəcəyini düşünürəm. Bazar günü Trabzonspor ilə oynayacağımız oyun çox çətin olacaq. Ancaq biz hər zaman dediyim kimi, meydana qorxmadan çıxan, mübarizə aparan və eyni zamanda futbolu ilə zövq verən bir komanda olmaq istəyirik. Daha ikinci Avropa matçımızı oynadıq, bu komandanın birlikdə vaxta ehtiyacı var. Amma mən bugünkü oyundan və oyunçularımın göstərdiyi xarakterdən çox xoşbəxtəm. Samsunspor yoluna əmin addımlarla davam edəcək" deyə əlavə edib.

24 saat