Zelenski ABŞ-ın Ukrayna planı üzrə işə qərarlı

Ukrayna Prezidenti Zelenskiydən Cenevrə görüşləri barədə açıqlama

Ukrayna Prezidenti Volodimir Zelenskiy özünün sosial media hesabında ABŞ-ın Ukrayna sülh planı ilə bağlı müzakirələrinin İsveçrənin Cenevrə şəhərində davam etdiyini bildirib. Onun sözlərinə görə, Ukrayna nümayəndə heyəti müharibəni sonlandırmaq, sülhü bərpa etmək və davamlı təhlükəsizliyi təmin etmək üçün səylə çalışır. Zelenskiy qeyd edib ki, nümayəndə heyətindən ilkin görüşlərin nəticələri barədə qısa məlumatlar daxil olub. ABŞ-ın təkliflərində artıq Ukrayna vizyonuna əsaslanan və ölkənin milli maraqları üçün kritik əhəmiyyət kəsb edən bir sıra elementlərin nəzərə alına biləcəyi aydın olur.

Kanada Baş naziri ilə telefon danışığı

Zelenskiy başqa bir açıqlamasında Kanada Baş naziri Mark Kerney ilə telefonla danışdığını vurğulayıb. Ukrayna Prezidenti Cenevrədə davam edən görüşlər barədə Kerneyə məlumat verdiyini söyləyərək, "Ukrayna ABŞ-ın təklif etdiyi addımlar üzərində mümkün qədər konstruktiv şəkildə işləməyə qətiyyətlidir" qiymətləndirməsini verib. O, müharibəni sonlandırma yolunu "realistik etmək" üçün səylərini davam etdirdiklərini qeyd edib və ölkəsinə verdiyi dəstəyə görə Kerneyə təşəkkürünü bildirib.

Gələcək təhlükəsizlik təminatları və sülh planının başlanğıcı

Prezident Zelenskiy həmçinin Ukrayna üçün təhlükəsizlik təminatları məqsədilə formalaşdırılan "İstəklilər Koalisiyası" çərçivəsində də danışıqların yaxın günlərdə keçiriləcəyini söyləyib. Qeyd edək ki, ABŞ prezidenti Donald Tramp administrasiyası tərəfindən hazırlanmış 28 maddəlik sülh planı təklifi Kiyevə təqdim edilmişdi. Ukrayna Prezidenti Zelenskiy bu sülh planı barədə Avropalı liderlərlə telefonla müzakirələr aparmışdı. Müharibəni sonlandırmaq üçün ABŞ tərəfindən hazırlanan sülh planının müzakirə olunacağı görüşlər İsveçrənin Cenevrə şəhərində bu gün başlayıb. Ukrayna nümayəndə heyətinə Prezident Ofisinin rəhbəri Andriy Yermak başçılıq edir.

24 saat