ABŞ Qəzzaya yardım artımını vurğulayır, fələstinlilər "süni aclıq" iddia edir

ABŞ Ağ Evi Qəzza zolağına hər gün təxminən 700 humanitar yardım yük maşınının daxil olduğunu bildirir. Lakin fələstinlilər və yardım təşkilatları bu rəqəmləri şübhə altına alaraq, vəziyyətin Ağ Evin iddia etdiyi qədər yaxşı olmadığını vurğulayırlar. Oktyabrın 10-dan etibarən Qəzza zolağına 15 minə yaxın ticarət malları və humanitar yardım daşıyan yük maşınının daxil olduğu bildirilir. Ağ Evin sözçüsü Dilan Consonun sözlərinə görə, İsrail-HƏMAS atəşkəsi qüvvəyə mindikdən bəri gündə orta hesabla 674 yük maşını bölgəyə daxil olub. O, həmçinin bildirib ki, humanitar yardım işçiləri oktyabrın 10-dan etibarən bir milyondan çox insana ərzaq bağlamaları çatdırıblar və Qəzzada yemək istehsalı sentyabrın sonundan bəri 82 faiz artıb. Conson hətta İsrailin bölgəyə bütün humanitar yardımı tamamilə blokadaya aldığı fevral ayından bəri ilk dəfə yumurtaların Qəzza mağazalarının rəflərində göründüyünü də qeyd edib. Bu rəqəmlər müstəqil şəkildə təsdiq edilməyib. Birləşmiş Millətlər Təşkilatının Ümumdünya Ərzaq Proqramının (WFP) məlumatına görə, Qəzzaya hal-hazırda tələb olunan ərzaq yardımının yalnız yarısı çatır. Fələstin yardım agentlikləri koalisiyası isə atəşkəs razılaşması çərçivəsində razılaşdırılan ümumi yardım tədarükünün cəmi dörddə biri olduğunu bəyan edib. Conson, ABŞ-ın Qəzzada yaşayanların kritik ehtiyaclarını ödəmək üçün "tarixi səyə" rəhbərlik etdiyini və ABŞ Prezidenti Donald Trampın administrasiyasının fələstinlilərə "ləyaqət və hörmətlə" yanaşmağa sadiq olduğunu vurğulayıb.

"Mühəndislənmiş aclıq" ittihamları

ABŞ-ın iddialarına baxmayaraq, Qəzzadakı şərait ağır olaraq qalır. Qəzzanın Hökumət Media Ofisi cümə axşamı günü bildirib ki, atəşkəsin başlanğıcından bəri razılaşdırılan yardım maşınlarının cəmi 28 faizi – ümumilikdə 4453 nəqliyyat vasitəsi – bölgəyə daxil olmasına icazə verilib. Bu, vəd edilən 15600 maşından xeyli azdır və gündəlik cəmi 171 yük maşını təşkil edir. Media Ofisi bu məhdud miqdarın "minimum humanitar yardım həddindən qat-qat aşağı" olduğunu qeyd edərək, ərzaq, dərman, yanacaq və yemək qazı kimi əsas təchizatları təmin etmək üçün gündə ən azı 600 yük maşınının dərhal daxil edilməsini tələb edib. Media Ofisi həmçinin İsraili "mühəndislənmiş aclıq" siyasəti həyata keçirməkdə ittiham edib. Bildirilib ki, İsrail hakimiyyəti yumurta, ət, pendir, tərəvəz və qida əlavələri də daxil olmaqla 350-dən çox əsas qida məhsulunu qadağan edərək, yerinə içkilər, şokolad və cips kimi aşağı dəyərli məhsulların şişirdilmiş qiymətlərlə satışına icazə verib. Mətbuat xidmətinin bəyanatında deyilir: "Bu, işğalın mülki əhaliyə qarşı silah olaraq qida manipulyasiyası siyasətini qəsdən həyata keçirdiyini sübut edir."

"Bu, hələ başlanğıcdır"

Dilan Conson isə ABŞ-ın rəhbərlik etdiyi yardım səylərini təbliğ edərək bildirib ki, "hər gün 17 min kubmetr (4,5 milyon gallon) içməli su çatdırılıb, bu da təkcə oktyabr ayında şimali Qəzzada içməli suyun 130 faiz artmasına səbəb olub". O, "böyük irəliləyiş əldə olunduğunu, lakin görüləcək çox iş olduğunu" deyərək, "bu, hələ başlanğıcdır" ifadəsini işlədib. Birləşmiş Millətlər Təşkilatının Humanitar Məsələlərin Koordinasiyası Ofisi (OCHA) atəşkəsdən bəri cənubi Qəzzada yaxşılaşmalar olduğunu qeyd edərək, iyul ayında gündə bir dəfə yemək yeyən ailələrin indi iki dəfə qidalandığını bildirib. Lakin, şimali Qəzza zolağında ərzaq təhlükəsizliyinin hələ də fəlakətli vəziyyətdə qaldığı vurğulanıb. BMT sözçüsü Farhan Haq cümə günü bildirib ki, humanitar yardıma çıxış imkanları yaxşılaşsa da, insanların təcili ehtiyacları hələ də çox böyükdür və yardım karvanları yalnız iki İsrail keçidinə məhdudlaşdırılıb. WFP, Qəzzaya humanitar yardım və tibbi təchizatla dolu karvanların daxil olması üçün bütün keçid məntəqələrinin açılmasını tələb edərək, şimal keçidlərinin davamlı olaraq bağlı qalması ilə bağlı heç bir izahat verilmədiyini qeyd edib.

24 saat