Əli Kərimli 2 ay yarım həbs qətimkanına alındı

AXCP sədri Əli Kərimli həbs olundu: Hakimiyyəti zorla ələ keçirmə ittihamı

Azərbaycan Xalq Cəbhəsi Partiyası (AXCP) sədri Əli Kərimli barəsində 2 ay 15 gün müddətinə həbs qətimkan tədbiri seçilib. Bu qərar dekabrın 1-də Səbail Rayon Məhkəməsində elan edilib. Əli Kərimli Azərbaycan Respublikasının Cinayət Məcəlləsinin 278.1-ci maddəsi ilə ittiham olunur ki, bu da hakimiyyəti zorla ələ keçirməyə və dövlətin konstitusiya quruluşunu zorla dəyişdirməyə yönələn hərəkətləri nəzərdə tutur. Müxalifət liderinin həbsi ölkədə ciddi siyasi rezonans doğurub.

Kütləvi saxlanılmalar və Dövlət Təhlükəsizliyi Xidmətinin əməliyyatları

Noyabrın 29-da Dövlət Təhlükəsizliyi Xidməti (DTX) tərəfindən saxlanılan Əli Kərimlinin evində altı saatdan çox davam edən axtarış aparılıb. Eyni gündə AXCP Ali Məclisinin katibi Məmməd İbrahim, partiya sədrinin köməkçisi Faiq Əmirli, AXCP üzvü Ruslan Əmirov və partiyanın keçmiş üzvü Saleh Rüstəmli də saxlanılıb. Sonradan Faiq Əmirli, Ruslan Əmirov və Saleh Rüstəmli azadlığa buraxılsalar da, digər şəxslər barəsində istintaq tədbirləri davam edir.

Ramiz Mehdiyevlə əlaqəli iddialar və AXCP-nin mövqeyi

Hökumətyönlü mətbuatda yayılan xəbərlərə görə, Əli Kərimlinin həbsi keçmiş Prezident Administrasiyası rəhbəri Ramiz Mehdiyevə qarşı açılmış cinayət işi ilə əlaqədardır. AXCP-nin məlumatına görə isə, DTX əməkdaşları Əli Kərimlinin evində axtarış zamanı Ramiz Mehdiyevin Rusiya prezidenti Vladimir Putinə yazdığı iddia olunan məktubun nüsxəsini qəsdən yerləşdirərək "aşkar" ediblər. Bu məktub əvvəllər hökumətə yaxın mediada yayılmış və R.Mehdiyevin Putinə Azərbaycanda keçid hökuməti qurmağı təklif etdiyi iddia edilmişdi. Ramiz Mehdiyevin bu məsələyə rəsmi münasibəti ictimaiyyətə məlum deyil. Əli Kərimli özü isə daha əvvəl Ramiz Mehdiyevlə əməkdaşlıq etməsi barədə bütün iddiaları qətiyyətlə təkzib etmişdi. AXCP rəhbərliyə qarşı irəli sürülən bütün ittihamları rədd edir və bunu hakimiyyətin müxalifətə qarşı yönəlmiş növbəti repressiv kampaniyası adlandırır.

Milli Şuranın hədəfə alınması: Deportasiya və dindirilmələr

Gərgin siyasi vəziyyət fonunda Milli Şura üzvlərinə qarşı da təzyiqlər müşahidə olunur. Noyabrın 30-a keçən gecə Milli Şuranın üzvü Gültəkin Hacıbəyli Türkiyədə saxlanılaraq deportasiya olunacaq şəxslər üçün nəzərdə tutulan təcridxanaya aparılıb. Dekabrın 1-də hökumətyönlü mediada onun artıq Azərbaycana deportasiya edildiyi və DTX-də dindirildiyi barədə xəbərlər yayılıb. G.Hacıbəyli Türkiyə polisi tərəfindən saxlanılarkən "Toplum TV"-yə verdiyi telefon müsahibəsində ona qarşı irəli sürülən bütün ittihamları rədd etmişdi. Həmçinin, noyabrın 30-da Milli Şuranın sədri Cəmil Həsənli də DTX-də dindirilməyə cəlb olunub. İfadəsi alındıqdan sonra sərbəst buraxılan C.Həsənli, ona Ramiz Mehdiyevlə əlaqələri və öz siyasi fəaliyyəti barədə suallar verildiyini bildirib.

24 saat