Ermənistanın belə istehsal imkanları çatışmır

Azərbaycan-Rusiya münasibətlərində gərginlik və həll yolları

Azərbaycan Prezidentinin köməkçisi Hikmət Hacıyev Brüsseldə yerləşən "EU Today" nəşrinə verdiyi müsahibədə Azərbaycan-Rusiya münasibətlərinə toxunaraq, iki ölkə arasında mövcud əlaqələrin cari vəziyyətini şərh edib. O, ötən ilin dekabrında AZAL təyyarəsinin qəzası səbəbindən yaranan bəzi anlaşılmazlıqları və emosional gərginliyi dilə gətirib. Lakin bu narazılıqların oktyabr ayında

Düşənbədə dövlət başçıları arasında baş tutan görüşdə müzakirə edildiyini qeyd edib.

Cənab Hacıyev Bakının təyyarə qəzası ilə bağlı Moskvadan dörd əsas tələbinin olduğunu xatırladıb: rəsmi üzrxahlıq, hadisənin hərtərəfli istintaqı, məsuliyyət daşıyan şəxslərin ədalətli şəkildə cəzalandırılması və qurbanlara kompensasiya ödənilməsi. Hikmət Hacıyev vurğulayıb ki, "bu məsələlər öz həllini tapdıqdan sonra anlaşılmazlıq səhifəsini geridə qoyacaq və iki ölkə arasında normal qonşuluq münasibətlərini davam etdirəcəyik".

Sanksiyalardan yan keçmə iddiaları və Ermənistanın rolu

Prezident köməkçisi Rusiyanın Qərb sanksiyalarından yan keçməsinə Azərbaycanın kömək edib-etməməsi ilə bağlı sualı cavablandırarkən bu iddianı qəti şəkildə rədd edib. O, Bakının sanksiyalar məsələsində olduqca diqqətli olduğunu və ticarət məlumatlarının 2022-ci ildən sonra Rusiya ilə ticarət dövriyyəsində ciddi artım müşahidə edilmədiyini bildirib.

Digər tərəfdən, Hikmət Hacıyev Ermənistanın Rusiyaya sanksiyalardan yan keçməkdə yardım etdiyini iddia edib. O qeyd edib ki, Rusiyada satışı qadağan edilən, lakin hələ də mövcud olan brendlər məhz Ermənistandan idxal olunur. Cənab Hacıyev əlavə edib ki, "bu markalar Ermənistanda istehsal olunmur, Qərb ölkələrindən oraya idxal edilir. Ermənistan “Mercedes", "Apple" və ya "Samsung" kimi məhsulları istehsal edəcək imkanlara sahib deyil". Bu iddialar Azərbaycan-Rusiya münasibətləri fonunda regional dinamikaları bir daha diqqət mərkəzinə gətirir.

24 saat