Ertuğrul Doğan: Qısa müddətli həllər keçmişdə qaldı
Trabzonspor Klubunun prezidenti Ertuğrul Doğan bildirib ki, onlar artıq qısa müddətli həllər əvəzinə uzunmüddətli strategiyalarla irəliləyirlər.
Ertuğrul Doğan Trabzonspor jurnalındakı yazısında qeyd edib ki, Trabzonspor bu gün yenidənqurma prosesini qətiyyətlə və planlı şəkildə həyata keçirir. O, "Klubumuzun gələcəyini təmin etmək üçün idman və iqtisadi sahələrdə eyni vaxtda addımlar atırıq. Məqsədimiz davamlı bir quruluş yaratmaq və bu quruluşu daimi etməkdir" ifadələrini işlədib.
Gənc oyunçular Trabzonsporun gələcəyini formalaşdırır
Bu mövsüm heyətlərinə qatdıqları gənc oyunçuların yalnız bugünkü ehtiyacları ödəmədiyini, eyni zamanda gələcəyin Trabzonsporunu da formalaşdırdığını vurğulayan Doğan bunları qeyd edib: "Hər transfer uzunmüddətli planlamanın bir hissəsi kimi dəyərləndirilir. İnkişafa açıq, dəyər yarada biləcək bir oyunçu profili üzərindən irəliləyirik. Bu yanaşma klubumuzun həm idman, həm də iqtisadi gücünü artırmağı hədəfləyir. Keçmiş illərdə edilən səhvlər bizə mühüm təcrübə qazandırdı. Yanlış planlamaların klubun maliyyə və idman balansını necə çətinləşdirdiyini gördük. Artıq qısa müddətli həllər əvəzinə uzunmüddətli strategiyalarla irəliləyirik. Nizamlı maliyyə idarəetməsi, şəffaflıq və düzgün transfer siyasəti bu prosesin əsasını təşkil edir."
Hakimlər Trabzonsporun qarşısını kəsdilər
Doğan bu gün meydanda baş verənlərin də bu inşa prosesinin bir parçası olduğunu qeyd edərək, "Liqanın ilk həftələrində komandamız hakimlərin açıq şəkildə əleyhimizə işlədiyi bir mühitdə mübarizə apardı. Qəsdən edilən müdaxilələrlə formalaşan oyunlar oynadıq. Son olaraq Fənərbaxça səfərində qələbəmizin qarşısı yenə hakimlər tərəfindən kəsildi. Futbolun ədalətli bir zəmində oynanması tək başına Trabzonspor üçün deyil, bütün klublar üçün zəruridir. Ədalət hər kəsə lazımdır" qiymətləndirməsini verib.
Trabzonsporun ən böyük gücünün hər zaman tərəfdarı olduğunu da bildirən Doğan "Bu gün də bütün proseslərin sağlam irəliləməsi üçün ən mühüm ünsür sizlərin dəstəyidir. Yenidənqurma zaman alır, amma sonunda daha güclü və daha möhkəm bir Trabzonspor ortaya çıxar" ifadələrini işlədib.
Oxucu Şərhləri
Şərh Yaz