Əsrlərdir quruya çıxmayan okean sakinləri

İndoneziya və Filippin arasında uzanan arxipelaqda, quru torpaqdan daha çox dənizlə iç-içə həyat sürən Bajau xalqı özünəməxsus yaşam tərzi ilə diqqət çəkir. "Dəniz Qaraçıları" kimi də tanınan bu icma, evlərini okean üzərində qurur, dolanışığını tamamilə balıqçılıqdan təmin edir və illərdir davam etdirdiyi ənənəvi həyat tərzini müasir dövrə rəğmən qoruyub saxlayır.

DALIŞ BACARIQLARI VƏ FİZİKİ UYĞUNLAŞMA

Bajau xalqı ən çox su altı bacarıqları ilə tanınır. Ənənəvi üsullarla balıq ovlayan bu icma, dalış zamanı heç bir xüsusi avadanlıqdan istifadə etmədən 70 metr dərinliyə qədər enə bilir. Bəzi qəbilə üzvlərinin 13 dəqiqəyə qədər su altında qala bildiyi qeyd edilir. Alimlər, bu xüsusiyyətin uşaqlıq yaşlarından etibarən qazanılan bir vərdiş və fiziki adaptasiya ilə izah oluna biləcəyini bildirirlər.

ÜZƏN YAŞAYIŞ MƏNTƏQƏLƏRİ VƏ SAKİT ŞƏHƏRLƏR

Filippinin cənubunda yerləşən Tawi-Tawi və Sitangkai adalarında bu icmanın yaratdığı üzən yaşayış məntəqələri ölkənin "görünməyən üzü" kimi adlandırılır. Su üzərində qurulmuş evlər, aralarından keçən taxta kanallar və balıqçı qayıqları ilə bu bölgələr adətən "cənubun Venesiyası" adlandırılır.

Lakin ərazi uzun illər əvvəllər burada fəaliyyət göstərən Əbu Səyyaf təşkilatı səbəbindən "təhlükəli bölgə" kimi tanınırdı. Hazırda isə onların kəndlərində sülh və qonaqpərvərlik hökm sürür.

MÜASİR DÜNYAYLA TƏMASLARI

Müasir dünyadan kənarda görünsələr də, onlar texnologiyadan tamamilə uzaq deyil. Dənizin ortasında "Starlink" peyk interneti vasitəsilə əlaqə quran bu icma, məhdud olsa da, rəqəmsal ünsiyyət qura bilir.

Bu bölgələrdə turist yoxdur. Lakin beynəlxalq mediada və sənədli filmlərdə onların adı tez-tez çəkilir. Xüsusilə "Dəniz Adamı" ləqəbli Jaqo adlı bir Bajau, BBC başda olmaqla bir çox beynəlxalq nəşrə mövzu olmuşdur. 89 yaşlı Jaqonun həyatı boyu dənizdən heç ayrılmadığı, lakin oğlunu okeanda itirdikdən sonra özünə qapandığı bildirilir.

KÖÇƏRİ DƏNİZÇİLƏRDƏN MÜASİR BALIQÇILARA

XVIII və XIX əsrlərdə dəniz quldurluğu ilə də tanınan Bajau xalqı, zamanla öz kimliyini dəyişdirərək balıqçılıq və dəniz məhsulları ticarətinə yönəlmişdir. Malayziya, Filippin və İndoneziya sahillərinə yayılan icma bu gün də ənənəvi üsullarla balıq ovlamağa davam edir. Onların unikal dalış texnikaları hələ də həyat tərzinin əsasını təşkil edir.

24 saat