GİZLİ HƏYATIN ÜZƏ ÇIXMASI VƏ İZOLASİYA
Həmin evdə yaşayan ailənin varlığını tamamilə xarici dünyadan gizlətdiyi, baxımsız və xarabalıq vəziyyətində olan mənzildə zibil yığınları və istifadəyə yaramayan əşyalar arasında yaşadıqları bildirilir. Aparılan araşdırmalar nəticəsində uşaqların Almaniyada doğulduğu və sonradan İtaliyaya köçdüyü müəyyən edilib. Ailənin uzun müddət cəmiyyətdən izolasiya olunmuş şəkildə yaşadığı qeyd olunur.
"XƏYALƏT UŞAQLAR" DÖVLƏT HİMAYƏSİNDƏ
Turin Məhkəməsi uşaqların valideynlərindən alınmasına qərar verib. Məhkəmənin açıqlamasında, "uşaqların qayğılarından məsul olan valideynlər və ya qohumları tərəfindən lazımi şəkildə təmin edilmədiyinə dair dəlillər var" deyə bildirilib. İtaliya mətbuatı bu uşaqları "xəyalət uşaqlar" adlandırarkən, 54 yaşlı hollandiyalı heykəltəraş olan ataları "Corriere Torino" qəzetinə verdiyi müsahibədə, "Uşaqlarımı sevirəm və sadəcə onları qorumaq istəyirdim" deyib. O, evdə noutbuk, musiqi alətləri, xizək avadanlıqları olduğunu, hətta atlara mindiklərini və muzey gəzintilərinə çıxdıqlarını iddia etsə də, uşaqların oxumaq və yazmağı bilmədiyi müəyyənləşib.
QORXUDAN İZOLASİYA OLUNMUŞ BÖYÜMƏ
Uşaqların bu şəkildə izolasiya olunmuş böyüdülməsinin səbəbi kimi atanın xüsusilə Covid-19 kimi infeksiyalara qarşı böyük qorxu keçirməsi göstərilib. NL Times-ın məlumatına görə isə, uşaqlar alınarkən 38 yaşlı hollandiyalı ananın laqeyd münasibət sərgilədiyi qeyd olunur. Ananın evsiz olduğu ehtimalı üzərində dayanılır.
Lauriano bələdiyyə sədri Mara Bakolla hadisə ilə bağlı açıqlamasında, "Bu, çox həssas bir məsələdir. Bu uşaqlar nəhayət tarazlığı tapa bilər və adına yaraşan bir yaşama qovuşa bilər" deyib. O, atanın özünəqapanıq biri olduğunu və italyan dilini bilmədiyini də əlavə edib.
Bölgədə yaşayanlar isə fermada uşaqların yaşadığını öyrənəndə böyük təəccüb yaşayıblar. Uzun müddət istifadəsiz qaldığı bilinən evin satıldığından xəbərləri olsa da, heç kimin içəridə uşaqların yaşadığına dair məlumatı yox idi. Hazırda uşaqlar dövlət himayəsindədir və onların himayədar ailələrə yerləşdirilməsi üçün işlər davam edir. Valideynlərin cinayət məsuliyyətinə cəlb olunub-olunmayacağı isə hələlik qeyri-müəyyən olaraq qalır. Bu hadisə uşaqların müdafiəsi sahəsindəki boşluqları bir daha gündəmə gətirib.