Gömrük sədrinə məhkəmə çağırışı tələbi

Şahid İfadələri Və Təzyiq İddiaları

Bakı Ağır Cinayətlər Məhkəməsində noyabrın 24-də hakim Azər Tağıyevin sədrliyi ilə Toplum TV işi üzrə növbəti iclas keçirilib. Prosesdə iş üzrə şahidlərin dindirilməsi davam etdirilib. Şahidlər Fidan Əlicanova və Cəmilə Əzimova ibtidai istintaq zamanı təzyiqlə üzləşdiklərini bildiriblər. Cəmilə Əzimova xüsusilə vurğulayıb ki, müstəntiq ona qışqıraraq səhərə qədər polis bölməsində saxlamaqla hədələyib. Hər iki şahid telefonlarının qanuni sənəd təqdim edilmədən müsadirə olunduğunu və hələ də geri qaytarılmadığını qeyd edib.

Məhkəmə Salonunda Gərginlik: Jurnalistlə İttihamçı Arasında Mübahisə

Şahidlərin dindirilməsi zamanı Toplum TV işində təqsirləndirilən jurnalist Fərid İsmayılovla dövlət ittihamçısı Rauf Malışov arasında gərgin mübahisə yaranıb. Jurnalist ittihamçının şahidə verdiyi suala etiraz edib, Rauf Malışov isə ona "otur aşağı" deyərək, "onunla belə danışa bilməz" ifadəsini işlədib. Mübahisə nəticəsində Fərid İsmayılovun halı pisləşib və o, məhkəmə zalından müvəqqəti olaraq çıxarılıb.

Şahin Bağırovun Dindirilməsi Tələbi Və Rədd Edilən Vəsatətlər

Fərid İsmayılov məhkəmə zalına qayıtdıqdan sonra Dövlət Gömrük Komitəsinin sədri Şahin Bağırovun məhkəməyə gələrək ifadə verməsi ilə bağlı vəsatət qaldırıb. O bildirib ki, ölkə xaricindən sonuncu dəfə gələrkən könüllü şəkildə gömrük yoxlamasından keçib və üzərində qanunsuz əşya və ya pul vəsaiti olmaması barədə sənəd alıb. Buna görə də, özünün qaçaqmalçılıqda ittiham edilməsinin ziddiyyətli olduğunu və Şahin Bağırovun bu məsələyə aydınlıq gətirməli olduğunu vurğulayıb.

Jurnalist həmçinin qeyd edib ki, Gömrük Komitəsinin istintaqla paylaşdığı bəyannamələrdə də üzərində pul və ya qiymətli əşya aşkar edilmədiyi qeyd olunub. F.İsmayılov bu ziddiyyəti dilə gətirərək soruşub: "Əgər Gömrük Komitəsi də bizim üzərimizdə heç nə tapmadığını təsdiq edirsə, onda hansı qurum doğru danışır? Şahin Bağırov gəlib cavab versin ki, hara baxırdı? Necə oldu ki, bir ildə iyirmidən çox jurnalistin qaçaqmalçılıq ittihamı ilə həbsindən sonra "Vətənə xidmətə görə" medalı aldı?" Məhkəmə vəsatətin cinayət işi ilə əlaqəli olmadığını əsas gətirərək onu təmin etməyib. Bu qərara digər təqsirləndirilən şəxslər də etiraz edərək vəsatəti müdafiə ediblər.

Təqsirləndirilən Şəxslərin Etirazları Və Həbs Müddəti

"Toplum TV"nin videoredaktoru Müşfiq Cabbar bildirib ki, təxminən il yarım həbsdə olsalar da, hələ də hansı əsaslarla saxlanıldıqlarını bilmirlər. O əlavə edib ki, heç kimə maaş verməyib və əleyhinə heç bir ifadə yoxdur. Hakim Azər Tağıyev isə cavab olaraq işin hələ də araşdırıldığını deyib. III Respublika Platformasının qurucu üzvü Ruslan İzzətli hakimin bu cavabına etiraz edərək, "Onda bizi buraxın, çıxaq gedək. Araşdırıb bitirəndə bizi çağırıb deyərsiniz ki, filan işləri görmüsünüz, cəzanız da budur" ifadəsini işlədib. R.İzzətli daha sonra ev dustaqlığına buraxılması üçün vəsatət versə də, məhkəmə bunu da təmin etməyib. Müşfiq Cabbar, ev dustaqlığına buraxılan "Sputnik Azərbaycan" əməkdaşlarının ölkəni necə tərk etdiyini soruşanda isə hakimin "bunu onların özlərindən soruşmaq lazımdır" cavabına "Bura Azərbaycandır, burada hər şey formaldır" deyərək sualının ritorik olduğunu vurğulayıb.

"Toplum TV İşi" Üzrə Yeni İttihamlar Və Həbslər

Ümumilikdə Toplum TV işi üzrə 10 nəfərə cinayət işi açılıb. III Respublika Platformasının spikeri Akif Qurbanov, bu qurumun qurucu heyət üzvü Ruslan İzzətli, "Toplum TV"nin həmtəsisçisi Ələsgər Məmmədli, videoredaktor Müşfiq Cabbar, jurnalist Fərid İsmayılov, Demokratik Təşəbbüslər İnstitutunun əməkdaşları Əli Zeynal, İlkin Əmrahov və Ramil Babayev həbs olunublar. Jurnalist Elmir Abbasov polis nəzarətinə verilib, "Toplum TV" redaktoru Şahnaz Bəylərqızı isə əvvəlcə ev dustaqlığına buraxılsa da, sonra haqqında polis nəzarətinə verilməklə qətimkan tədbiri seçilib. Toplum TV işi üzrə həbs edilənlər öncə qaçaqmalçılıqda ittiham edilsələr də, sonradan ittiham ağırlaşdırılıb. Təqsirləndirilən şəxslər ittihamları rədd edir və siyasi sifariş əsasında həbs olunduqlarını bəyan edirlər.

24 saat