İsraildən Qəzza işğalına son qoymaq tələbi güclənir

İsrail mediasının məlumatına görə, Qəzzada atəşkəs və əsir mübadiləsi sazişinə vasitəçilik edən ölkələr Tel-Əviv rəhbərliyinə təzyiq göstərərək, zolağın tam işğalı planına son qoyulmasını və danışıqların yenidən başlamasını tələb edir.

Dövlət televiziyası KAN-ın xəbərində vasitəçilərin Tel-Əvivin həmin ərazini işğal etmək planını dayandırmaq və rəhbərliyi danışıqlar masasına qaytarmaq üçün güclü təzyiqlər etdiyi vurğulanıb. Xəbərdə adı açıqlanmayan mənbənin "İşğal planı təsdiqlənmədən danışıqlara qayıtmaq ehtimalı yoxdur" sözləri qeyd olunub.

Vasitəçilər həm Baş nazir Binyamin Netanyahunun işğal planını dayandırmağa çalışır, həm də HƏMAS-a danışıqlar masasına qayıtması üçün təzyiq göstərirlər.

Qətər, Misir və ABŞ HƏMAS ilə bu dövlət arasında atəşkəs və əsir mübadiləsi danışıqlarına vasitəçilik edir.

Baş nazir Binyamin Netanyahunun Qəzza zolağının tam işğalı da daxil olmaqla, hücum planlarını müzakirə etmək üçün cümə axşamı axşam Təhlükəsizlik Kabinetini toplayacağı bildirilirdi.

Hücumlarda On Minlərlə İnsan Həlak Olub

Hərbi qüvvələr zolaqda yanvarın 19-da qüvvəyə minən atəşkəsdən sonra martın 18-də səhər saatlarında yenidən şiddətli hücumlara başladı. 2023-cü il oktyabrın 7-dən bu yana bölgəyə təşkil etdiyi hücumlarda azı 61 min 158 fələstinli həyatını itirib, 151 min 442 nəfər isə yaralanıb.

Atəşkəsi pozduğu martın 18-dən etibarən həmin əraziyə təşkil etdiyi hücumlarda isə 9 min 654 nəfər həlak olub, 39 min 401 nəfər yaralanıb.

Mayın 27-dən bu yana ABŞ idarəçiliyindəki "Qəzza Humanitar Yardım Fondu" tərəfindən humanitar yardım adı altında yaradılan paylama bölgələrində fələstinlilərin hədəf alındığı sistematik hücumlar nəticəsində həlak olanların sayı 1655-ə, yaralıların sayı isə 11 min 800-ə çatıb.

İsrail ordusu zolaqda işğalı genişləndirəcək və daimi edəcək hücum planını həyata keçirməyə başlayıb. Baş nazir Binyamin Netanyahu zolağın hamısını işğal edəcəklərini açıqlayıb.

24 saat