Misir su təhlükəsizliyi üçün qəti addımlar atacaq

Misir və Uqanda Əməkdaşlığı: Su Təhlükəsizliyi Məsələsi

Misir Xarici İşlər Nazirliyindən verilən rəsmi açıqlamaya əsasən, nazir Əbdülati Su İşləri Naziri Hani Suveylim ilə birlikdə Uqandanın paytaxtı Kampalaya işgüzar səfər edib. Səfər çərçivəsində Əbdülati uqandalı həmkarı Henri Oryem Okello ilə görüş keçirib.

Görüşmə zamanı tərəflər Misir və Uqanda arasındakı ikitərəfli əlaqələrin müxtəlif aspektlərini, o cümlədən region üçün həyati əhəmiyyət kəsb edən su təhlükəsizliyi məsələlərini müzakirə ediblər.

Əbdülati Nil çayı hövzəsində yerləşən bütün ölkələrin maraqlarının qorunması məqsədilə beynəlxalq hüquq normalarına uyğun əməkdaşlığın davam etdirilməsinin vacibliyini vurğulayıb. O, hövzədə beynəlxalq hüquqa zidd şəkildə atılan birtərəfli addımların qəbuledilməz olduğunu bəyan edib.

Əbdülati qeyd edib ki, Misir öz su təhlükəsizliyini təmin etmək üçün beynəlxalq hüququn müəyyən etdiyi çərçivədə bütün lazımi tədbirləri görməyə hazırdır.

Misirin Su İşləri Naziri Suveylim isə öz növbəsində bildirib ki, Nil çayı ilə bağlı beynəlxalq hüquq normalarına hörmət, Nil hövzəsi ölkələrinin ümumi maraqları naminə səmərəli əməkdaşlığın təməlini təşkil edir.

Efiopiya və Hədaşi Su Bəndi Mübahisəsi

Efiopiya, Misir və Sudan arasında uzun illərdir ki, Şərqi Afrikada yerləşən Hədaşi Su Bəndi layihəsi ilə bağlı fikir ayrılıqları mövcuddur.

Öz ərazisindən Nil çayı sularının təxminən 80 faizinin qaynaqlanmasına baxmayaraq, yalnız 3 faizindən istifadə edə bilən Efiopiya, Afrikanın ən böyük layihələrindən biri olaraq planlaşdırılan Hədaşi Su Bəndinin tikintisinə 2 aprel 2011-ci ildə start vermişdi.

Bu bənd Sudan-Efiopiya sərhədinə yaxın bir ərazidə, Nil çayının əsas qollarından olan və ümumi su həcminin 85 faizini təşkil edən Mavi Nil üzərində inşa edildiyi üçün strateji əhəmiyyətə malikdir.

Efiopiya hökuməti Hədaşi Su Bəndi vasitəsilə ölkənin artan enerji tələbatını ödəməyi və hətta elektrik enerjisini ixrac etməklə iqtisadi gəlirlərini artırmağı hədəfləyir.

Əddis-Əbəbə administrasiyası Misir və Sudanla hələ də vahid bir razılaşma əldə olunmamasına baxmayaraq, bəndin doldurulması prosesində israrlı mövqe nümayiş etdirir. Lakin Qahirə və Xartum rəhbərlikləri isə, Nil çayı suyunun payçı ölkələr arasında ədalətli paylanmasını təmin etmək məqsədilə, əvvəlcə hərtərəfli üçtərəfli anlaşmanın imzalanmasının vacib olduğunu vurğulayır.

Beynəlxalq ictimaiyyətin və xüsusilə aşağı axın ölkələrinin etirazlarına baxmayaraq, 2020-ci ilin iyul ayında bənddə ilk su dolumu prosesi həyata keçirilmiş, 2022-ci il fevralın 20-də isə elektrik enerjisi istehsalına başlanmışdı.

24 saat