Suriya Prezidenti Şaraya sui-qəsd cəhdi önləndi

Adını açıqlamayan iki yüksək səviyyəli rəsmi, Suriya Prezidenti Ahmed əş-Şaraya terror təşkilatı DEAŞ tərəfindən iki dəfə sui-qəsd cəhdinin qarşısının alındığını bəyan edib. Suriyalı yüksək səviyyəli təhlükəsizlik məmuru və Yaxın Şərq rəsmisi sui-qəsd cəhdlərinin son bir neçə ayda baş verdiyini bildirib. Onlar bu cəhdləri Şara'nın devrilmiş lider Bəşər Əsəddən sonra ölkədə sülh və sabitliyi bərpa etmək istiqamətindəki səylərinə birbaşa təhdid kimi qiymətləndiriblər. Mənbələr, hücumlardan birinin onun iştirakı elan edilmiş rəsmi nişan mərasimini hədəf aldığını qeyd etsələr də, əlavə detallar açıqlamayıblar. Suriya ərazisində ötən həftəsonu terror təşkilatı DEAŞ-la mübarizə əməliyyatları keçirilmiş, 70-dən çox şübhəli şəxs həbs edilmişdi. Bu genişmiqyaslı əməliyyatlar regionda sələfi ideologiyasına bağlı ekstremist qruplara qarşı mübarizənin hələ də aktual olduğunu göstərir.

Ağ Evdə Tarixi Görüş

Suriya Prezidenti Ahmed əş-Şara bu gün ABŞ Prezidenti Donald Trampla keçirəcəyi görüş üçün şənbə gecəsi paytaxt Vaşinqton D.C.-yə gəlmişdi. Bu səfər, Suriya liderinin beynəlxalq arenada nüfuzunu artırmaq cəhdlərinin bir parçası olaraq dəyərləndirilir. Ahmed əş-Şara bu gün Ağ Evdə ABŞ Prezidenti Donald Trampla bir araya gələcək. Görüşdə Suriyanın müharibədən sonrakı yenidənqurma prosesi, xarici sərmayə və iqtisadi əməkdaşlıq imkanları, Suriya üzərindəki ABŞ sanksiyalarının ləğvi və ya yumşaldılması, DEAŞ-ın Suriyada hələ də mövcud olan ünsürləri ilə mübarizəyə yönəlmiş birgə səylər, Suriyadakı fərqli silahlı qrupların mərkəzi hökumətlə inteqrasiyası və ordunun tək komanda altında birləşdirilməsi kimi əsas məsələlərin masaya yatırılması gözlənilir. Bu strateji danışıqlar həm Suriyanın gələcəyi, həm də regional təhlükəsizlik və sülhün bərqərar olması baxımından böyük əhəmiyyət kəsb edir. Şara sentyabr ayında keçirilən Birləşmiş Millətlər Təşkilatının Baş Assambleyasına 58 il sonra müraciət edən ilk Suriya lideri olmuşdu. O, həmçinin Ağ Evə rəsmi dövlət başçısı səfəri edən ilk Suriya lideri olaraq tarixə düşəcək ki, bu da iki ölkə arasındakı münasibətlərdə yeni bir səhifə açmaq potensialına malikdir.

24 saat