Xankəndidə saxlanılan Karen Avanesyan məhkəməyə verildi

Karen Avanesyanın işi Gəncə Ağır Cinayətlər Məhkəməsinə göndərilib

Bu il sentyabrın 14-də Xankəndi şəhərində ələ keçirilən Karen Avanesyanla bağlı cinayət işinin ibtidai istintaqı başa çatıb. Noyabrın 28-də Azərbaycan Baş Prokurorluğunun yaydığı məlumata əsasən, iş baxılması üçün aidiyyəti üzrə Gəncə Ağır Cinayətlər Məhkəməsinə göndərilib.

Prokurorluq tərəfindən verilən məlumata görə, Karen Avanesyan terrorçuluq əməllərində və üç polis əməkdaşına xəsarət yetirməkdə ittiham olunur. Bildirilir ki, o, hüquq-mühafizə orqanlarının qanuni tələblərinə tabe olmaqdan imtina etdiyi üçün polis tərəfindən odlu silah tətbiq olunmaqla saxlanılıb. Saxlanıldıqdan sonra ona zəruri tibbi yardım göstərilib və xəstəxanada müalicə olunub.

Karen Avanesyanın Xankəndidə saxlanılmasının təfərrüatları

Daxili İşlər Nazirliyinin (DİN) əvvəllər yaydığı məlumatda 1967-ci il təvəllüdlü Karen Avanesyanın sentyabrın 14-də Xankəndi şəhərində keçirilən əməliyyat zamanı tutulduğu qeyd olunur. Məlumatda vurğulanır ki, o, yaşadığı yerdən şəhərin yaxınlığındakı meşə massivinə yollanıb və əvvəlcədən orada gizlətdiyi "Kalaşnikov" avtomatını, ona aid patronla dolu dörd sandıqcanı, eləcə də beş qumbaranı götürüb.

K. Avanesyan bu silah-sursatla Xankəndi şəhərində keçirilən hər hansı tədbir yerinə yaxınlaşmaq niyyətində olarkən polis əməkdaşları tərəfindən zərərsizləşdirilib və saxlanılıb. Bu insident bölgədə təhlükəsizlik tədbirlərinin yüksək səviyyədə həyata keçirildiyi bir dövrdə baş verib.

İrəli sürülən cinayət ittihamları

Karen Avanesyana qarşı Cinayət Məcəlləsinin bir neçə ağır maddəsi ilə ittiham irəli sürülüb. Həmin maddələr bunlardır: 29,120.2.3, 29,120.2.4, 29,120.2.7, 29,120.2.11 (ictimai təhlükəli üsulla iki və daha çox şəxsi terrorçuluqla əlaqədar qəsdən öldürməyə cəhd), 214.2.3 (odlu silahdan istifadə etməklə terrorçuluq törətmə), 228.1 (qanunsuz olaraq odlu silah saxlama, əldə etmə və daşıma) və 315-ci (hakimiyyət nümayəndəsinə qarşı müqavimət göstərmə və zor tətbiq etmə).

24 saat