Fazil Qasımov Penitensiar Xidmətdə döyüldüyünü bildirir

Apellyasiya Məhkəməsi İclasında Vəkillə Ünsiyyət Problemləri

İyulun 29-da Bakı Apellyasiya Məhkəməsində həbsdə olan iqtisadçı Fazil Qasımovun şikayəti üzrə növbəti baxış iclası keçirilib. İqtisadçı məhkəmədə 42 gündür vəkili Nemət Kərimli ilə əlaqə saxlaya bilmədiyini bəyan edib. O, vəkili ilə gizli ünsiyyət üçün vaxt tələb edib və hakim onlara 5 dəqiqə fasilə verib. Fasilə zamanı Fazil Qasımov sənədlərini vəkilinə vermək istəyərkən, konvoy sənədləri əlindən alıb və otaqdan çıxıb. Daha sonra konvoy geri qayıdaraq sənədləri hakimə təqdim edib. Qasımov bu hərəkətin qanunsuz olduğunu vurğulayaraq, sənədlərin vəkilinə verilməsini tələb edib. Yalnız bundan sonra sənədlər vəkilə çatdırılıb. Vəkil N. Kərimli də F. Qasımova sənədlər vermək istəsə də, hakim buna imkan yaratmayıb.

Fazil Qasımovun Cəzaçəkmə Müəssisəsində Zorakılıq İddiası

Ardınca Fazil Qasımov məhkəməyə gətirilməzdən əvvəl saxlanıldığı Umbakı qəsəbəsindəki cəzaçəkmə müəssisəsində Penitensiar Xidmətin beş əməkdaşı tərəfindən zorakılığa məruz qaldığını bildirib. Qasımovun sözlərinə görə, məhkəməyə təqdim etmək üçün yazdığı apellyasiya şikayətinə əlavələrin ona qaytarılmasını tələb edərkən, Penitensiar Xidmətin iki əməkdaşı arxadan onun qolundan tutub. Bu zaman Ramin adlı rəis müavini onun üzünə iki şillə vurub və boğazından tutaraq boğmağa cəhd edib. İqtisadçı rəis müavininin ona “sən cinayətkarsan, biz cinayətkarlarla belə davranırıq” dediyini vurğulayıb. F. Qasımov məhkəmədə özünü psixoloji və fiziki cəhətdən çox pis hiss etdiyini, təcili tibbi yardıma ehtiyacının olduğunu qeyd edib. Bu səbəbdən o, məhkəmə iclasının təxirə salınmasını istəyib. Hakim F. Qasımovun səhhəti ilə əlaqədar məhkəmə iclasını avqustun 6-sı saat 16:00-a təxirə salıb.

Qasımovun Aclıq Aksiyası Və İttihamların Təfərrüatları

Fazil Qasımov mayın 21-dən başlayaraq azadlığa buraxılması tələbi ilə təxminən iki ay ərzində aclıq aksiyası keçirib. O, iyulun 17-də aclığı dayandırıb. Qubad İbadoğlunun işi ilə əlaqədar 2023-cü ildə Türkiyədə saxlanılaraq Azərbaycana gətirilən F. Qasımov bu il martında doqquz il müddətinə azadlıqdan məhrum edilib. O, Cinayət Məcəlləsinin saxta pul və ya xarici valyuta əldə etmə, satış məqsədilə hazırlama və ya satma - eyni əməllər mütəşəkkil dəstə tərəfindən törədildikdə maddəsilə ittiham olunub. Qasımov özü bu ittihamları rədd edir. Qubad İbadoğlu 2023-cü ilin iyulunda həbs olunub, saxta pul və ya xarici valyuta əldə etmə, satış məqsədilə hazırlama və ya satma, eləcə də dini

ekstremist

materialları hazırlama, saxlama və ya yayma maddələri ilə ittiham olunur. O da ittihamları qəbul etmir. Ötən ilin aprelində Qubad İbadoğlu ev dustaqlığına buraxılıb, mayda isə bu qətimkan tədbiri də dəyişdirilərək polis nəzarətinə verilib.

24 saat