Süni İntellekt Məsləhəti 50 İllik Xəstəliyi Yenidən Qaytardı, Xəstəxanaya Düşdü

SÜNİ İNTELLEKTİN YANLIŞ MƏSLƏHƏTİ PSİXİ SAĞLAMLIĞI TƏHLÜKƏYƏ ATDI

Sağlamlığını yaxşılaşdırmaq məqsədilə duz (natrium-xlorid) istehlakını azaltmaq istəyən bir şəxs, alternativ tapmaq üçün ChatGPT-yə müraciət edib. Chatbot ona natrium-bromid istifadə etməyi məsləhət görüb. Həmin şəxs bu kimyəvi maddəni internetdən sifariş edərək qidasına əlavə edib. Lakin natrium-bromid mətbəxlərdə deyil, əsasən isti su hovuzlarının təmizlənməsi üçün istifadə olunan bir maddədir.

PARANOYA HÜCUMLARI VƏ XƏSTƏLİYİN QAYIDIŞI

Təxminən üç ay sonra xəstə, qonşusunun onu zəhərlədiyi barədə paranoya düşüncələri ilə təcili tibbi yardım şöbəsinə gəlib. İlk 24 saat ərzində halüsinasiyalar və artan paranoya əlamətləri göstərən xəstə, qaçmağa cəhd etdikdə məcburi psixiatrik müşahidə altına alınıb.

Müalicə zamanı şəxs tətbiq etdiyi pəhrizin detallarını izah edib. Aparılan testlər nəticəsində orqanizmdə bromidin həddindən artıq yığılmasından qaynaqlanan və bromizm olaraq bilinən ciddi zəhərlənmə vəziyyəti diaqnoz edilib. Ümumiyyətlə, sağlam şəxslərdə bromid səviyyəsi 10 mq/L-dən aşağı olduğu halda, bu xəstənin qanında ölçülən göstərici heyrətamiz şəkildə 1.700 mq/L təşkil edib ki, bu da normadan kəskin yüksəkdir.

UNUDULMUŞ XƏSTƏLİK YENİDƏN ORTAYA ÇIXDI

Bromizm XX əsrin əvvəllərində tibb dünyasında geniş yayılmış və o dövrdə ümumi psixiatrik müraciətlərin təxminən 8%-ə qədərini təşkil edən bir durum idi. Lakin 1970-80-ci illərdə bromid tərkibli dərmanların tibbi istifadədən çıxarılması ilə bu vəziyyət demək olar ki, tamamilə yox olmuşdu.

Üç həftəlik müalicə prosesindən sonra xəstə tamamilə sağalaraq evə buraxılıb. Lakin mütəxəssislərin fikrincə, əsas problem süni intellekt texnologiyasının hələ də kritik məsələlərdə insan biliyini və mütəxəssis məsləhətini əvəz edə bilməməsidir.

SÜNİ İNTELLEKTİN RİSKLƏRİ BARƏDƏ XƏBƏRDARLIQ

Bu tədqiqatın müəllifləri ciddi bir xəbərdarlıq edərək bildiriblər ki, "ChatGPT və digər süni intellekt sistemləri elmi səhvlər yarada bilər, təqdim olunan nəticələri tənqidi şəkildə müzakirə edə bilməz və bununla da yanlış məlumatların geniş yayılmasına səbəb ola bilər." Mütəxəssislər, xüsusilə vurğulayıblar ki, "Bir tibb mütəxəssisinin natrium-xlorid əvəzinə natrium-bromid tövsiyə etməsi tibbi etikaya uyğun deyil və çox az ehtimal olunan bir haldır." Bu diqqətçəkən hadisə "Annals of Internal Medicine: Clinical Cases" jurnalında dərc edilib.

24 saat