Ailəsi: Nazim Bəydəmirli ölümcül vəziyyətdə

Keçmiş deputat Nazim Bəydəmirlinin səhhətində ciddi pisləşmə müşahidə olunur. Bu barədə avqustun 4-də onun həyat yoldaşı Fəridə Bəydəmirli məlumat yayıb.

Səhhətinin pisləşməsi və narahatlıqlar

Fəridə Bəydəmirlinin sözlərinə görə, keçmiş deputatı müayinə edən həkim onda sətəlcəm aşkarlayıb və təcili antibiotik müalicəsinə başlamağın vacibliyini bildirib. Daha əvvəl ağır COVID-19 infeksiyası keçirmiş, ağciyərlərinin 45 faizi zədələnmişdi. Həyat yoldaşı qeyd edir ki, ağciyərlərinin yenidən soyuqlaması Nazim Bəydəmirlinin həyatını real təhlükə altına qoyur.

Fəridə Bəydəmirli avqustun 4-də saat 13:00-a planlaşdırılan telefon danışığının 30 dəqiqə gecikdiyini deyib. "Çox narahat oldum, çünki o, heç vaxt bir dəqiqə belə gecikməzdi. Narahatlığım əsassız deyilmiş. Telefonda səsi çox zəif gəlirdi, nəfəs ala bilmirdi, boğulurdu", - deyə o bildirib.

Tibb məntəqəsində rədd edilən müalicə

Telefon danışığı zamanı o, gecə saat 3:00-da demək olar ki, nəfəsinin kəsildiyini, boğulma halı yaşadığını söyləyib. Məhbus yoldaşlarının köməyi ilə tibb məntəqəsinə aparılıb. Orada onun hərarəti 37.7 dərəcə olub. Lakin o, tibbi yardımı göstərmək istəyən şəxsin həkim deyil, məhkum olduğunu görərək vena daxili müalicədən imtina edib.

Fəridə Bəydəmirli vurğulayıb ki, qanunvericiliyə görə, məhbusun səhhətində belə ciddi vəziyyət yarananda təcili yardım çağırılmalı və xəstəxanaya yerləşdirilməli idi.

Həbsinin səbəbi və ittihamlar

Nazim Bəydəmirli 2023-cü ilin iyununda Söyüdlü hadisələrində polislərin davranışını tənqid etdikdən sonra, həmin il iyulun 4-də saxlanılıb. Ona ilkin olaraq Cinayət Məcəlləsinin əmlaka sahib olmaq məqsədilə hədə-qorxu ilə qəsb etmə (maddə 182) maddəsilə ittiham irəli sürülüb. Sonradan o, təhdid yolu ilə tələb etmə (maddə 182) ilə də ittiham olunub.

2024-cü il sentyabrın 30-da məhkəmə onu 8 il müddətinə azadlıqdan məhrum edib. Nazim Bəydəmirli ittihamları qəbul etmir və özünü "ekologiya məhbusu" adlandırır. Hüquq müdafiəçiləri onu siyasi məhbus kimi tanıyıblar.

24 saat