Ülvi Həsənlinin 16 günə 15 kq arıqlaması iddiası

“Abzas Media”nın həbsdəki direktoru Ülvi Həsənlinin 16 gündür davam edən aclıq aksiyası nəticəsində səhhəti kəskin şəkildə pisləşib. Bu barədə jurnalistin həyat yoldaşı Rübabə Quliyeva məlumat yayıb.

R. Quliyevanın sözlərinə görə, jurnalist 16 gün ərzində 15 kiloqram çəki itirərək 63 kiloqrama düşüb. Onunla son görüşdə Həsənlinin ayaq üstə güclə dayana bildiyi vurğulanıb.

Saxlanma şəraiti və səhhətdəki problemlər

Qohumları bildirir ki, 40 dərəcə istidə aclıq edən jurnalist təkadamlıq kamerada saxlanılır. Kamerada nə pəncərə, nə də havalandırma sistemi mövcuddur. Həyat yoldaşı bu şəraitdə Həsənlinin nəfəs darlığından əziyyət çəkdiyini və ürək döyüntülərinin xeyli artdığını söyləyib.

R. Quliyeva Həsənlinin vəziyyətini daha da təfərrüatlı təsvir edərək qeyd edib ki, onun ürəyi yerindən çıxacaqmış kimi döyünür. Qan dövranının zəifləməsi nəticəsində ayaqları donur, bədənindən soyuq tər axır. Orqanizm sağ qalmaq uğrunda mübarizə aparır. Böyrəklərində ağrılar yaranıb, qan təzyiqi isə aşağı düşüb.

Tibbi yardımdan məhrumiyyət

Ailə üzvləri Həsənlinin səhhətinə heç bir həkimin nəzarət etmədiyini diqqətə çatdırıb. Onların sözlərinə görə, nəzarətçiyə yalnız insan hüquqları çərçivəsində valerian kökü həbi verilib ki, vəziyyəti pisləşsə, iki ədəd tabletka versin. Ailə bunu “göz görə-görə adamı öldürmək” kimi qiymətləndirir.

Bundan əvvəl ailə onun dərhal tibb müəssisəsinə köçürülməsini tələb etsə də, bu tələb yerinə yetirilməyib.

Aclıq aksiyasının başlanma səbəbi və digər iştirakçılar

Ülvi Həsənli iyulun 20-də Bakı İstintaq Təcridxanasına köçürülməsi ilə bağlı verilən vədin icra olunmaması səbəbindən müddətsiz aclıq aksiyasına başladığını elan edib.

Ona dəstək olaraq “Abzas Media”nın baş redaktoru Sevinc Vaqifqızı, eləcə də jurnalistlər Nərgiz Absalamova və Elnarə Qasımova iyulun 22-dən bu aksiyaya qoşulmuşdular. Lakin onlar ailə üzvlərinin səhhətində yaranan problemləri nəzərə alaraq iyulun 28-də aksiyanı dayandırıblar.

24 saat