İtaliya Dünyanın Ən Uzun Asma Körpüsü Layihəsini Təsdiqlədi

İtaliya uzun müddət təxirə salınmış dünyanın ən uzun asma körpüsü planına yekun təsdiqini verib. Bu, anakıta ilə Siciliya adasını birləşdirəcək və Messina boğazı üzərindən keçəcək, dəyəri 13.5 milyard avro (15.5 milyard dollar) təşkil edəcək bir layihədir. Nəqliyyat naziri Matteo Salvini çərşənbə günü əsas hökumət komitəsinin yolu açmasından sonra Messina körpüsünü "Qərbin ən böyük infrastruktur layihəsi" kimi qiymətləndirib. Onun sözlərinə görə, layihə illik 120 min yeni iş yeri yaradacaq və genişlənmiş infrastruktur sərmayələri vasitəsilə cənubi İtaliyanı canlandıracaq. İtaliya Hesablama Məhkəməsindən “yaşıl işıq” yanarsa, ilkin işlərə oktyabr ayından başlanıla bilər, tikintinin isə 2026-cı ildə başlayacağı gözlənilir. Salvini körpünün 2033-cü ilə qədər tamamlanacağını təxmin edib. 3.3 kilometr uzunluğunda olan bu körpü Türkiyənin Çanaqqala körpüsünü geridə qoyacaq və altı zolaqlı avtomobil yolu, iki dəmir yolu xətti daşıyacaq. Bu, hazırkı 100 dəqiqəlik bərə keçidini avtomobillə cəmi 10 dəqiqəyə endirəcək. Baş nazir Giorgia Meloni körpünün "qlobal əhəmiyyətli mühəndislik simvolu" olacağını bildirib. İlk dəfə 1969-cu ildə təklif olunan Messina körpüsü layihəsi, ətraf mühitlə bağlı etirazlar, mafiya narahatlıqları və seysmik risklər səbəbindən dəfələrlə dayandırılıb. Dizayn Türkiyənin Çanaqqala tikilisindən ilhamlanıb, yüksək küləklərdə sabitliyi artırmaq üçün qanad formalı güvertəyə malikdir.

Müdafiə, yoxsa inkişaf?

Roma bildirir ki, körpünün "ikili təyinatlı" infrastruktur kimi təsnifləşdirilməsi NATO-nun müdafiə xərcləri hədəflərinə çatmasına kömək edə bilər ki, bu da mübahisələrə səbəb olub. 600-dən çox akademik xəbərdarlıq edib ki, belə bir addım əlavə hərbi təhlükəsizlik qiymətləndirmələri tələb edəcək və körpünü potensial hədəfə çevirə bilər. Salvini qərarın müdafiə və iqtisadiyyat nazirliklərinə aid olduğunu, lakin körpü layihəsindən mütəşəkkil cinayətkarlığı uzaq tutmağın əsas prioritet olduğunu israr edib. Bu arada, ətraf mühit təşkilatları Avropa İttifaqına şikayətlər ünvanlayaraq köçəri quşlara potensial zərər vurula biləcəyi və layihənin ictimai maraq həddini ödəmədiyinə dair sübutların olmaması barədə xəbərdarlıq ediblər. Körpü müqaviləsi, 2006-cı ildə layihə ləğv edilməzdən əvvəl ilkin tenderi qazanan Webuild firmasına verilib. Şirkət öz dizaynının zəlzələlərə davamlı olacağını bildirir və Yaponiya, Kaliforniyadakı oxşar körpüləri nümunə göstərir. Webuild şirkətinin baş direktoru Pietro Salini bildirib ki, “bu körpü bütün ölkə üçün transformativ olacaq”.

24 saat